Qum ve buz (Səbinə Dəniz)

Biz səninlə heç vaxt qarşılaşmayacaq iki yad
Heç vaxt yan-yana gəlməyəcək iki ad
İki adam
İki bənd
İki bədən
İki cənnət üzlü cəhənnəm

Heç vaxt eyni yolları
Və heç vaxt eyni yorğanı paylaşmayacağıq
Savaşmayacağıq heçnədən
Və sevişməyəcəyik sonra

Al bu əllərimin istisini
Al, çəkinmə, isinərsən üşüsən
Və al bu siqaretin tüstüsünü
Çək canına, ciyərinə
Düşünməyə üşənsən

Sən ki bilirsən qorxularımı
O zaman niyə qorxudursan məni, adam?
Niyə toxunursan toxunulmamış hisslərimə?
Sus!
Dilinə gətirmə gedəcəyini
Gətirirsənsə, adam, niyə bağlayırsan yollarını ayaqlarıma?
Niyə deyirsən “Gülüm, üzülmə!”?
Və niyə bağlayırsan qapılarını üzümə?

Sus..
Qal demirəm
Al əlinə deyəcəklərini, götür, get
Yeriyərək getmə amma
Əriyib get..
Hiss etdirmədən
Oyanıb görüm ki su içindəyəm
Sonra anlayım ki “sən” içindəyəm

Yum yuxusuz gözlərini
Yum və sus
Biz səninlə kimik, adam?
Biz səninlə qum və buz.

2021dən qalan tək-tük şeirlərdən biri...❤️

Kitab