Sənə ürəyimdə bir ev tikmişəm

Hopub divarına payız sarısı.
Sənə ürəyimdə bir ev tikmişəm
Orda qurd ulayır gecə yarısı.
Orda sənsizlik var, bir də həsrətin
Orda çiçəkləri külək daramır.
O ev gözlərinə bənzəyir sənin
Yağışlar yağanda tavanı damır.
Sənə ürəyimdə bir ev tikmişəm
O evin üstündə göy üzü yoxdur.
Orda zaman donub, vaxt ölüb deyən
Orda gecələrin gündüzü yoxdur.
O ev qütb ulduzu batan yerdədir-
İçində fırtına, çölündə tufan
Orda səs-səmirsiz ölür adamlar
Ölür ayrılıqdan və tənhalıqdan.
sənə ürəyimdə bir ev tikmişəm
Gecəsi, küçəsi sənin adına
Gülüm, gəl baş-başa verib ağlayaq
Bu gecə o evdə ölən qadına,
Mənim ürəyimdə ölən qadına….